Plantun de Prouvènço

Pèr coumpara dos planto d'encò nostre

Hyoscyamus niger & Trisetum flavescens

Erbo-dóu-mau-de-dènt

Hyoscyamus niger

Solanaceae

Àutri noum : Jusquiam-negre, Erbo-de-bregand, Erbo-de-mort, Endourmidouire, Erbo-de-dènt.

Nom en français : Jusquiame noire.

Descripcioun :
L'erbo-dóu-mau-de-dènt es uno planto devengudo pu raro qu'à passa tèms emé l'esvalimen dis escabot de fedo. D'efèt trachis proche di jasso ounte soubro proun de femié. Autramen es eisado de recounèisse emé si poulìdi flour di dos coulour.

Usanço :
"L'ai agu ramassado, i'avié pas de dentisto coume i'a aro, e se sounavian coume acò... Alor metian la grano sus de braso, se brulavo, fumavo e metian uno bolo vuejo dessus, à l'envers, pèr que lou fum rentrèsse bèn, lou tournavon e i vieujavon d'aigo boulènto dedins, e fasian uno fumigacioun. Ero rare que lou mau de dènt passèsse pas", L. Saunier in O. Madon, op.cit. p. 109.

Port : Grando erbo
Taio : 20 à 80 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Hyoscyamus
Famiho : Solanaceae

Coulour de la flour : Jauno Vióuleto
Petalo : 5
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Noun
Remarco :

Liò : Escoumbre e proche dis oustau - Jasso
Estànci : Subremediterran à Mountagnard
Couroulougi : Pancaro entresigna
Ref. sc. : Hyoscyamus niger L., 1753

Civadoun

Trisetum flavescens

Poaceae Graminaceae

Noms en français : Avoine dorée, Avoine jaunâtre.

Descripcioun :
Lou civadoun douno d'èr à uno pichouno civado emé si pichòtis espigueto (5 à 8 mm) coulour de fen seca que caupon dos à quatre flour. L'enflourejado èi di proun daurado e esbrihanto un cop maduro. Se recounèis peréu i glumo de dessouto que soun mai courteto e estrecho qu'aquéli de dessubre. Li lemma porton de lònguis arèsto estacado dessouto li tres pèr dos (fotò), e emé un couide.

Usanço :
Lou civadoun pòu douna encò li fedo, la "caucinoso pulmounàri enzououtico", valènt-à-dire la fourmacioun de teissu fibrous dins li poumoun. Pèr acò dèu pas èstre vist coume uno planto pasturiero.